Rayon Sports WFC yegukanye igikombe cya shampiyona 2023-2024

Ikipe ya Rayon Sports WFC imaze imyaka 2 ishinzwe yegukanye igikombe cya shampiyona itsinze Muhazi United WFC.

Kuri uyu wa Gatandatu tariki 23 Werurwe 2024 ni bwo shampiyona y’icyiciro cya mbere mu Rwanda mu bagore yakomeje hakinwa umunsi wa 21.
Umukino wari utegerejwe na benshi ni uwo ikipe ya Muhazi United yakiriyemo Rayon Sports WFC ku kibuga cya AVEGA i Rwamagana , Rayon sports y’abagore yasabwaga gutsinda uyu mukino ubundi igahita yegukana igikombe cya shampiyona.


Ikipe ya Muhazi United WFC yatangiye igora ikipe ya Rayon Sports WFC ikina imipira miremire ndetse ukongeraho n’ikibuga kitari kiza ku buryo gukina umupira wo hasi byagoranaga.


Umukinnyi ukina asatira izamu mu ikipe ya Rayon Sports WFC, Mukandayisenga Jeanine uzwi nka ‘Kaboy’ yagerageje uburyo bwinshi imbere y’izamu, gusa ntibimukundire ariko bigeze ku munota wa 66 birakunda aterekamo igitego cya 1.


Nyuma y’iminota 10, imvura yari yahereye kare ishaka kugwa yahise igwa biba ngombwa ko amakipe aba avuye mu kibuga, ariko iza guhita abakinnyi basubira mu kibuga. Umukino warangiye Muhazi United WFC yari imbere y’abafana bayo itsinzwe igitego 1-0.


Rayon Sports WFC yahise itwara igikombe hakibura umukino 1 ngo shampiyona irangire kubera ko ifite amanota 58 ikaba irusha AS Kigali WFC iyikurikiye amanota 7 nubwo yo ifite umukino w’ikirarane.


Iyi kipe ya murera y’abagore yashinzwe muri 2022 ihita itangira gukina shampiyona y’icyiciro cya 2. Yazamutse muri shampiyona y’icyiciro cya mbere mu mwaka ushize none ihise itwara igikombe.

Scan the code